МАНЦИН ҺОЛИН УСН


МАНЦИН ҺОЛИН УСН

Давсн гейүртә цаг,
Домгт одачн әмд.
Һашун экин нульмсн,
Һолин догшн усн.

Дән эклхлә - залус,
Дәәнд һарад йовла.
Дәәнәс әмдәр ирлго,
Даргдад тендән үлдлә.

Көвүһән үзхәр эк,
Күндтә зурхачур ирлә.
Көвүнә кевтсн ормнь,
Келәд тернь үзүллә.

Көвүндән эк күрхәр,
Кедү цагтан көдллә!
Зоглслго һазр малтад,
Зурхачин үзүлсн ормд…

Күрч чадшгоһан медәд,
Көвүнә чирәһинь мартлго.
Нүднәс нульмс һооҗулад,
Нәәтгән экнь геелә.

Манц һолин усн -
Мартгдшго үрнә чирә.
Манц һолин усн -
Магтн саатулсн дуута.

Цуцрлт уга усн,
Цәәсн ик дольганта!
Цуг экнрин гейүр,
Цуснд ширгсн өвдкүртә.

Һашун усн көвәг,
Даңгин цокад бәәнә.
Һашудсн экин зүркн,
Дольгаг көөҗ цокна.

Герлин толян уснд,
Гилвкәд үринь үзүлхлә -
Түнгән бәрҗ авхар,
Түрсн түңшлһн соңсгдна.

Давсн гейүртә цаг,
Домгт одачн әмд.
Дусасн экин нульмсн -
Давста һолин усн.






Рейтинг работы: 0
Количество отзывов: 0
Количество просмотров: 22
© 09.10.2017 Шуурһна Раиса

Метки: #калмыцкий язык,
Рубрика произведения: Поэзия -> Стихи на иностранных языках
Оценки: отлично 1, интересно 0, не заинтересовало 0
Сказали спасибо: 1 автор












1